قالت غشيمـــــــــــــــــــــــــــــــــــــه ..

قالت غشيمه بالهوى وانت دكتور
وابيك تشرح لي عن الحب كلمات

هل فيه للعشاق والحب دستور
منهاج عشق ٍ ثابت ٍ طول الاوقات

وابيك تشرح لي عن العدل والجور
والبعد هل هو في بعيد المسافات

قلت الهوى لعبه وكل ٍ وله دور
والفايز اللي مايجي فيه صدمات

احد ٍ يعيش الحب ضحكات وسرور
واحد ٍ يعيشه هم واحزان واهات

قالت يقولون الهوى كله بحور
قلت اي نعم هذي حقيقه لها اثبات

ان الهوى راعيه في بحره يدور
يبغى السلامه مير مامن سلامات

راعي المحبه طول الاوقات مقهور
ويشاف في خده من الحزن دمعات

قالت واذا حبيت لي شخص مغرور
مثل الذي نقرا عنه في الروايات

ابيك تعطيني نصيحه ومشكور
تراي اخاف من الهوى والعلاقات

قلت الغرور يحول الحب لقبور
مثله مثل من يعشق انسان قد مات

والحب وش هو غير احاسيس وشعور
واحساس غامض يربط الذات بالذات

وقلبين ينبت وسطهن ورد وزهور
ووقت الوصل تصبح حدايق وجنات

وساعة جفا في حسابها عدة شهور
والثانيه عند المفارق بساعات

وسكت ماكملت يوم ٍ بدا النور
واشوفها مني تدنت بخطوات

قالت علامك قلت يابنت مجبور
من جرب الفرقا يجي فيه لوعات

قالت مفارق قلت عاشق ومهجور
وشوفي على خدي من الدمع رسمات

قالت اشوفك خاطرك دوم مكسور
ودايم عن الفرقا تغني لك ابيات

قلت ايــه خلي خافي الحال مستور
انا تراني عايش ٍ في معانات

ياما بنيت من الهوا صرح وقصور
وانهد كل اللي بنيته بلحظات

لكن تراي انسان منهي ومامور
( ولانيب ندمان ٍ على كل مافات )

وان كان ودك فالهوى نبني جسور
واعيش من عقب العذاب المسرات

قالت غشيمه فالهوى وانت دكتور
وابيك ترسم لي طريق البدايات

مزرررررررررررروف